Días dispersos.
-¿Qué faes, Fonso?
-¿Eh?
-¡Céntrate, ho! ¡Que vas romper el vasu!
-¿Eh?
-¡Fon!
-¿A qué venía yo a la cocina?
-¿Ónde tienes la cabeza?
-¿Qué hai de lo mio, Pili? ¿Sábese algo?
-Tirasti la cuchara a la basura y el vasu del yogur al fregaderu.
-¿Eh?
-¡Céntrate, Fonso!
-¿Eh?
-¡Que tas más perdíu qu’un chupu nel culu!
-Nun soi quien a quitamelo del pensamientu.
-¿El qué, ho?
-Alcaldíes, concejalíes, pactos de gobiernu…
-Tu tranquilu.
-¿Cómo que tranquilu? ¿Qué hai de lo mío?
-Lo que nun puedes ye andar sacando la basura a pasiar.
-¿Eh?
-Sacasti la basura a la cai y volvisti con ella pa casa.
-Ah.
-Fonsín, tienes que controlar l’ansiedá.
-En cuenta de dir p’alantre, Pili, vamos dir pa tras.
-¡Calla, ho!
-Vaya matu, verás…
-Tienes que centrate, Fon, tas apijotau.
-¿Eh?
-Dexasti prendía la luz del váter.
-¿Eh?
-Tas estresáu y tas estresandome a mi.
-Hasta que nun s’asiente tou…
-Tu tranquilu.
-¿Y lo mío? ¿Qué hai de lo mío?
-Fonso, ¿les llaves? ¿Ónde punxisti les llaves?
-A ver quién lleva lo mío…
-Despistáu yes, fíu. ¡Fai’l favor de centrate!
-Esto ye un sinvivir, Pili.
-¡Vas acabar rompiendo’l vasu!
-Tan engarriaos ente ellos y al pactar colos otros, ¿qué va pasar colo mío?
-Anda, Fon, apaga la luz del váter.
-A no ser que pongan a ún de los suyos pa nun mosquear al que taba con ellos.
-¡Espabila, Fonso!
-Pero si siguen a lo suyo, entós qué hai de lo mío.
-¡Fonsín, céntrate, ho!
-Si los que lleguen ponen a ún de los suyos, vuelven col que los traicionó a ellos, ¿y entós lo mío…?
-¡Fon, el vasu!
-¿Qué hai de lo mío?
-Tas poniéndome de los nervios.
-Toi dispersu, Pili. Mui dispersu…