En ocasiones veo culetes sueltos.
-¡Mira, mira!
-Déxalos, son foriatos.
-Yá, coño, pero un culete a un euro…
-Allá ellos. ¿A quién se-y ocurre…?
-Probes. ¿Y si nun pueden con tola botella?
-Coime, ¡que dexen la metá!
-Home, Lisardo…
-¡Toi poniéndome d’una mala hostia!
-Voi regalate una llámpara.
-¿Pa qué, ho?
-Pa que guardes el tu genio.
-Ye superior a mi, Lolo. Y la culpa ye del chigreru. Qué pocu respetu.
-¿A quién? ¿A los foriatos?
-A la sidra, cojona.
-¿Cómo ye, ho?
-¡La sidra hai que respetala, hai qu’echala, hai que mimala, quier miminos…!
-¿Mimala?
-Sí. Equí la sidra ta más fría que l’abrazu d’una suegra.
-Oye, vendiéndola por culetes yá vas ver como…
-¿Pero esto qué ye, Lolo, Benidorm? ¡Gonrós, acabamos con tou!
-Si la xente pídelo y paga un euro por culete…
-Yá. ¿Y vas tener la botella abierta hasta que llegue otru pa…?
-Bueno, oye, como les copes de vino o les cañes de…
-¿Pero qué tien que ver la sidra col vino? Home, nun me…
-Yes bien cerrau, Lisardo.
-¿Yo?
-Sí. Yes más clásicu que Beethoven. Los tiempos cambien, ¡hai qu’adaptase!
-¿A qué? ¿A los culetes eléctricos? ¿A vender culetes a un euro?
-Nun sías repunante, que la metá del chigre yá nun te fala por repunante.
-A mi me la sopla, Lolo. Ye una tema de cultura.
-¿El qué, ho?
-La temperatura, l’escanciáu, el ritmu de… ¡Acabamos con tou!
-Tranquilu, ho.
-Chipirones caramelizados, helao de fabada, los pinchos xelaos. Y agora…
-Lisardo, non te pongas histéricu.
-La sidra con tapón, culetes sueltos… ¿Qué mi madre ye esto?
-Cada persona ye un mundu, Lisardo.
-La sidra ye bebida compañera.
-Yá. ¿Pero si yes single?
-¡Jorobar la cultura de la sidra pa ganar cuatro perres…!
-Si lo piden los turistes…
-Hai que tresmiti-yos cómo ye la nuesa tierra, les nuestres costumbres…
-Tu tienes mucha costumbre de escupir en suelu y nun puedes obligar a naide.
-¡Dejaime en paz! ¡Ta petando la cabeza! ¡El mundu va dir a la mierda!
-¿Ves? Afuegueste nun vasu d’agua.
-¿Yo? ¡Eso sí que non!
-Bueno, de sidra. Afuegueste nun vasu de…
-Ah. ¡Eso sí! ¡Eso sí!
-¿Por qué lo tomes tou a coña menos la sidra, Lisardo? Nun lo entiendo.
-Porque si la vida fuera sidra tomariala en serio.