El aprecio en recesión.
-Siéntome güérfanu.
-¿Cómo ye, ho?
-D’amistaes, Silvino. Tengo la sensación de “nun tener amigos”.
-Oye, Senio, paez mentira…
-En serio te lo digo. Ye’l final, el ocaso de l’amistá.
-¡Meeeee! ¿De cuántes cerveces tamos falando?
-Déjate pijaes, nun ye por beber.
-¿Entós?
-Los amigos exigen un tiempu del que yá nun disponemos.
-¿Cómo que non?
-Vamos a lo nuestro, Senín, nun hai tiempu.
-Home, tando prexubilaos…
-Ye igual. Agora ye tou por guasap.
-¿Que qué, ho?
-Hai que hablalo, tenemos que venos, hai que quedar… pero depués na.
-¡Chisst, yo toi equí pa lo que faiga falta!
-Sí, ho, porque cuadró. ¿Pero cuándo vamos ver a Chuchu y a Paco y Pepa?
-Nada, eso ye ponese, quedar un día, llámote y…
-¿Ves? Llámote un día… pero depués na.
-Coime, Silvino…
-Sostener los sentimientos a lo llargo del tiempu ye un retu complicáu.
-Home…
-Y eso esplica que munches amistaes vaigan quedando atrás.
-¿Atrás?
-Sí. Sobremanera en cuanto entres na mediana edá. Y daste cuenta que, como dicía Gil de Biedma, la vida va en serio…
-¡Meeeeee! ¡Anda, nun chumes más!
-¿Por?
-Tas más espesu que la sopa de ladrillu.
-Ye la puta verdá, Senín.
-Sabes tu que yo te sigo muncho y doi-y me gusta a tou lo tuyo, sabeslo tu.
-Yá, yá, pero la vida nun ye feisbu, Senio.
-Selo yo, Silvino. Selo yo.
-Les redes crean un sentimientu de proximidá artificial cola xente a la que queremos. Nun son más qu’un simulacro.
-¿Por?
-A los amigos hai que velos, tocalos…
-¿Qué quies que faiga, que te meta mano?
-Antes quedábamos pa echar la partida.
-Ya. Agora xugamos online.
-¿Ves? Yá nun quedamos nin p’andar a hosties.
-¿Vamos p’fuera?
-¿Pa qué? ¡Póngote verde por twitter y a mamar! ¡Lleves hosties igual!
-Tamién ye verdá. Mucho cambió la vida, eh.
-Y pamique cola pandemia andamos toos algo chiflaos.
-Tas mimosón, Silvino. Nun te convien tanta birra.
-Toi quedándome sin amigos, nun-yos dedico tiempu, nun los cuido.
-Tranqui, Silvino. Aquí tienes un amigu.
-Yá, pero perdiose l’amistá auténtica.
-¡Gontumacho, menuda perreta!