¡Tiren sus agendas!
-Apuntalo na axenda, Amalio.
-¿Pa qué, ho?
-¡Coime, hai que planificar!
-¿En tres semanes? ¿Qué sé yo ónde voi tar? Y tu, igual.
-¿Por?
-¿Taremos superando un picu, allanando otra curva, potando n’una rotonda?
-¿Qué dices?
-Tal y como va la cosa, lo mismo ascendemos la cuarta qu’esguilamos el quintu repunte de la tercera ola.
-¡Ye San Valentín, vida!
-¿Y qué quiés planificar, Teresina?
-¡Quesiyo! Unes flores, una mascarilla decorá, una cenina, lo normal…
-¿Ónde, né? D’equí a allá con tantes restricciones, con tantu cierre perimetral, vas facer merienda-cena tu solina, en casa encerrá.
-Nun seas negatrón.
-Ye la Ley de Murphy, Teresina.
-¿Que qué, ho?
-Si algo pué salir mal, saldrá peor. Dígotelo yo.
-¡Ay calla!
-El bichu desatau, la cepa más mortífera, militares y concejales vacunándose a lo zorro…
-¿Qué, ho?
-La peña, Tere, pinchándose a escondies como en los ochenta, ¿daste cuenta?
-Bueno, pero…
-Por no hablar del culín.
-¿El qué, ho?
-¡Ni que les vacunes tuvieren “madre” como la sidra!
-¿Qué dices?
-¡Si nun usen la jeringuilla adecuá nun puén aprechar el últimu culín! ¡Eso cai de caxón!
-Traquilu, ho.
-El Murphy esi, Tere, que ye un cabrón…
-¡Bah! Pues yo tópome genial.
-Ya se te pasará.
-¡Ay Amalio, por favor…!
-¡Tamos fartos ya! ¿Nun ves cómo tá la xente, con qué agresividá…?
-Un día más, un día menos.
-Borrachos en patinete eléctricu, fiestes ilegales, negacionistas de la nieve…
-Ya escampará.
-Sí, ho. Nun ganamos pa borrascas: Filomena, Hortensia, Ignacio… Paez la lista de la mi clase de tercero de EGB.
-Saldremos más fuertes, Amalio, acuérdate de la campaña del Gobierno.
-¡Coño, en eso acertaron!
-¿Por?
-España, el país europeu onde más engordó la xente durante la pandemia.
-¿En serio?
-Cuatro de diez españoles subimos de pesu, seis quilos de media.
-Mucho ye la mala hosta, Amalio.
-Claro, Tere. Vamos tragando, vamos tragando…
-Yo llegué a un puntu, que val más saltame que rodeame.
-Tas bien guapa, vida. Si nun fuera por lo que ye, sacábate a bailar.
-¡Ay bueno…! Tu apuntalo na axenda, Amalio.
-Qué va, Teresina, qué va. Nun pueo planificar.