Ocio y dominio de varias especialidades.
-Taba visto.
-¿El qué, ho?
-Lo de Biden, Ramón. Yo namás sentir lo de Wisconsin…
-¿Lo de quién, ho?
-Yera clave, taba visto. Missouri y Nebraska son otru rollu. Pero Wisconsin…
-¿Qué, ho?
-Ye un estau clave, Ramón. Les coses como son.
-Ah.
-Y de Wichita nun te digo na.
-¿Entós?
-Los de Wichita van a su rollu. Si tuvieran los güevos que tienen en Michigan digote yo que…
-¡Qué finu yes, Herminio!
-¿Por?
-¡Sabes la de Dios!
-Home, entre yo y el mi cuñau somos especialistas en too.
-¡Fae falta gente como vosotros, que táis de leer prensa, de oír el arradio…!
-Ya. Pero son necios, nun nos faen casu.
-¿Quién, ho?
-Llevo diciéndolo una pila meses: ¡el virus muta, oveyas! ¡Muta! Ni putu casu.
-Pero…
-Veslos en tertulies, en programas, en les redes y dan pena.
-Ya. ¡Ta la vida complicá, Herminio, mui complicá!
-En tres días salvaba yo el planeta, fíjate lo que te digo.
-Calla, ho.
-Aquí onde me ves, paseme cuatro noches pendiente del conteo.
-¿Del qué, ho?
-Los votos, Ramón. Digo: estos palman.
-¿Quiénes, ho?
-Los dos: ún con 74 años y el otru con 77, y un final de infarto.
-¿Pero fue pa tanto?
-Ahora Trump anda pidiendo el VAR. Tando en la Casa Blanca ye normal.
-Uf. Nun das puntá sin hilo, eh.
-Yo soi mui finu, dígote la verdá, tenía que tar nel establishment.
-¿Ónde, ho?
-Si yo fuera más influyente controlabase la pandemia echando hosties.
-No sé, no sé…
-¿Tu sabes la pila reportajes, documentales, tertulies, estaos del feisbu y cartes al director que veo cada día yo?
-Home, Herminio…
-¿Van hablame a mí ahora de Wichita, ho?
-Home…
-¿Van contame lo que ye la segunda ola?
-Oye, no…
-Yo, Ramonín, lo mismo te aplano la curva que te gano la Costa Oeste.
-Calla, ho.
-Y si te cuento les mis investigaciones al rey emérito…
-¡Ye increíble!
-¿El qué?
-Desde que cerraron los chigres y pases mañana, tarde y noche en casa viendo la tele yes otra persona.
-¿Por?
-Yes todólogo, Herminio. ¡¡¡Sabes de too!!!
-¿Van hablame a mí de Wichita? ¿Van hablame a mi de Wisconsin, ho?