Recelos de precampaña.
-¡Que ye peor, Arsenio!
-Que non.
-Que sí, Senín, que ye peor un estúpidu qu’un malváu, dígotelo yo.
-¿Por?
-Ye más peligrosu.
-¿Por?
-¡Coime, el mal ye más fácil d’identificar y combatir!
-Sí, ho.
-Nes películes siempres sabemos quien ye’l malu.
-Taría guapo…
-Pero na vida los fatos tienen peligru.
-Calla, ho.
-Debatir con un fatu ye como intentar xugar al axedrez con un palomu.
-¿Cómo ye?
-Balta les pieces, caga nel tableru y vuela de regresu a la so bandada pa proclamar la victoria.
-Jojojo.
-Nun tien gracia, Senio, esi ye’l problema.
-¿Cuál?
-¡Coime, que lo tomamos a broma!
-¿Qué quies facer, ponete a razonar?
-Claro, non, selo yo.
-¿Entós?
-Non puedes combati-yos cola razón.
-Claro. Val más pasar de too. Babayos…
-Ya, ya. El babayu nun ye una amenaza mientres nun tenga poder.
-¿Cómo ye?
-La babayada non te inhabilita para ocupar un cargu o autoridá, eh.
-Ya, home, pero…
-La hestoria y la política tán llenes d’exemplos, cuidao.
-Habelos hailos, sí.
-Ye como si’l fechu de garrar poder contagiara a una gran parte de la humanidá cola estupidez.
-¡Meeee! Mui profundu te veo.
-Lleguen arriba, Arsenio, y acabose la independencia, el pensamientu críticu y la reflexón.
-¡Mecagonrós!
-¿Qué ye, vas dicime que non? El poder convierte a les persones n’autómates.
-Veote mui densu.
-Los pensadores intelixentes y críticos agora tienen un guion pa lleer.
-¿Y qué?
-Usen les sos sorrises en llugar de los sos celebros.
-Pos yo prefiero un estúpidu qu’un malváu.
-Calla, ho.
-¡Mil veces!
-A la xente malvao cuésta-y tomar el poder, precisen xente estúpido para faer el so trabayu.
-Los fatos tan como oveyes, ¿qué saben ellos?
-Por eso, Arsenio.
-¿Qué?
-Si la babayada toma’l control… ponte no peor.