Media Asturias haciendo las maletas.
-¿Da-y una vuelta?
-Si, Asun, no sé, viajar con otra mentalidá…
-¿Pero qué me tas contando, Luis Fernando?
-Nada, eso, que lo mismo qu’abrimos la maleta podemos abrir la pareja.
-¿Eh?
-Llega’l veranín, Asun, vamos pa La Bañeza…
-¿Y?
-Nun sé, vida, polo que pueda pasar.
-¿Pasar de qué, ho?
-Que son munchos díes, eh. Que depués tiramos pa Sahagún, Astorga, Villamanín, Villamañán…
-¿Metisti’l neceser?
-Nun me cambies de conversación, eh. Esto hai que hablalo.
-¿El qué, ho?
-Tu mira Shakira y Piqué… Yo prefiero decitelo de mano.
-¿El qué, Luis Fernando?
-Nun podemos siguir asina, Asun. Tantos años viviendo un amor esclusivu, monógamu y…
-¿Entós?
-Hai qu’evolucionar un poco, Asunción, el veranín, la líbido, el calorón…
-¿Yá tamos col mismu rollu de tolos años?
-Bah.
-¿Alguna vez tuvimos alguna aventura, algún problema, algún rollu, cuernos, nun sé, alguna vez tentáronnos o nos pasó algo?
-Non, pero hai que hablalo. A lo mejor esti añu…
-¿Qué, ho?
-¿Quién te diz a ti que toi yo solu na piscina y nun me surge sexu esporádicu?
-Sí, ho…
-Yo lo que quiero ye tenelo claru, ¿oíste? Qu’en habiendo terceres persones…
-Pero si pases casi dos meses durmiendo y bebiendo cerveza.
-Yá, pero esti añu…
-¿Qué, ho?
-Voi sacar tiempu pa explorar tolos recovecos del to cuerpo.
-¡Meee, depués de trenta años! ¿Qué ye, que nun te vagó?
-Bah, un día por otru…
-Llegues a La Bañeza, pones pantalón cortu, y tienes menos morbo qu’un bizcu hinchando un globu.
-Bueno, oye. ¿Podemos acostanos con otra gente pero sin lazos afectivos?
-¿Que qué, ho?
-Hai que hablalo, Asun: un poco de swinger, un pactu de fluidos…
-¡Tas tu guapu! ¡¡¡yes supercelosu!!!
-Yá, pero…
-En cuanto pongo’l pareo y ves como me miren los otros te pones tan nerviosu…
-Sí, pero esti añu tengo muncha compersión.
-¿Comper qué, ho?
-Yo, si te sal cualquier cosa, empatizo contigo, Asun. El tema ye hablalo.
-¿Pero qué me va salir, Luisfer? ¡Si toi contigo, toi contigo!
-Ya, pero esti añu ta too tan raro…
-¡La madre que te parió, tanto ver Tele5 te va a petar la cabeza!
-Lo mesmo qu’abrimos la maleta…
-Sí, ho. ¡Tas tu guapu pa abrir la pareja!
-Que sía lo que Dios quiera… Lost en La Bañeza.