¡Habrá que probarlo todo!
-¿Ónde vas tan cargau, Eligio?
-Pa casa.
-¡Pera un poco ho! ¡Toma algo!
-Nun pueo, échaseme el tiempu encima.
-¿Entós?
-Voi deshaceme de lo que ya nun sirve pa recibir el añu con un hogar totalmente limpiu.
-¿Cómo ye ho?
-De mano, voi barrer la casa con fuerza hacia la calle.
-¿Pa qué?
-Coime, ¡pa eliminar tola energía negativa que me rodea!
-¡Mecagonmimacho!
-Echaré una carrerina con la maleta por la barriada pa tener un añu viajeru.
-¡Buena gana! ¿Oíste?
-¿Por?
-Nun habiendo aquí trabayu vas tener que emigrar igual.
-Ya, pero pa eso llevo la escalera.
-¿Pa qué ho?
-Pa subime en ella y que el próximu añu sea de continuo ascenso.
-Nun ye por ná, Eligio, pero a ti fáltate una garcillá.
-¿Por qué ho?, ¿qué ye, que tú nun ficiste la lista?
-¿Qué lista?
-La de los deseos, los anhelos, pa que tus sueños se fagan realidad.
-Qué va, yo nun fago lista ni pa dir a comprar.
-Pues mui mal, Sensio. ¡Has de confiar en el rito del fuego!
-¿En qué ho?
-Escribes tolo negativo en un papelín y con una vela blanca conviertes los problemas en ceniza.
-¡Sí ho! ¿Cómo yes tan oveya?, ¿qué pienses, que así vamos salir d’esta?
-¿Y quién nos va sacar?, ¿el FMI, la Merkel, Rajoy, el…?
-Ya, ho. Pero…
-Mira, Sensio, yo llegué a tal puntu de desesperación que ¡¡¡voi probalo too!!!
-¿Pusiste calzoncillos rojos?
-¡Home va, llevo un par! ¡Verás a partir de enero qué movida sexual!
-Qué inocentón yes, chaval.
-Un deseo por cada uva y acabes faciendo el amor por encima de tus posibilidades.
-¡Calla ho! ¡Inocentón!
-Y depués, ¡una cucharadina de lentejes!
-¿Por?
-Pa garantizar la abundancia y la prosperidad.
-¡Bah, bah, a ti llantárontela hasta atrás!
-Tú faime casu y recibe el añu con una moneda en les zapatilles.
-¿Pa qué ho?
-¡Pa tener perres asgaya! ¿Qué ye, que no me crees ho?
-Si te digo la verdá… ¡Tengo más enfotu en ti que en Montoro!
-¡Normal! ¡Y toles luces prendides!
-¿Qué qué ho?
-Pa que el hogar irradie prosperidá.
-Sí ho. Ahora que van subir el recibu…
-Ye igual, Sensio. El tema ye eliminar la mala energía y atraer coses mejores en tu vida.
-¡Cagontal, parez un programa electoral!
-Claro, prefiero engañame a mi mismu a que me engañen los demás.
-¿Qué qué ho?
-¡Hai que resistir, manín!
-Ya, ya.
-Unos culinos, un cachín de turrón y pa la cama con un mantra.
-Será una manta.
-No, no, un mantra: ¡Sin el pueblu nun sois nada! ¡Sin el pueblu nun sois nada!
-Uf. ¡Que tengamos buena salida y entrada!